Tokante investigashon di deurwaarder di korte den Karibe Hulandes
7 januari 2016
Ombudsman Nashonal a investiga un kehu riba un deurwaarder den Karibe Hulandes.
E Ombusman Nashonal a pidi e deurwaarder pa e tin atenshon pa e manera kon e ta aksesibel pa siudadano i ta reakshona den nan asuntonan. E deurwaarder awor por mustra mehorashon.
Deurwaarder di Korte den Karibe Hulandes
Ombudsman Nashonal a investiga un kehu riba un deurwaarder den Karibe Hulandes. Mas konkretamente senora Eijk (1) a keha ku e deurwaarder, banda di a notifika un sentensha na 2011, por lo demas no a tuma akshon pa kobra e plaka serka e partido, ku pa hues a keda sentensha na paga un suma di
plaka na senora Eijk. Tambe senora Eijk a keha ku e deurwaarder no a reakshona riba su emailnan i yamadanan telefoniko tokante esaki.
Investigashon
Despues di intervenshon di Ombudsman Nashonal e deurwaarder riba 16 di december 2014 a reakshona por eskrito riba e kehu. E Ombudsman Nashonal a duna senora Eijk i e deurwaarder e oportunidat pa reakshona riba e reakshon di e otro i riba su preguntanan. Tambe el a ofrese na ambos banda pa
intermedia. Senora Eijk a kontesta i tabata dispuesto pa asepta intermediashon. E deurwaarder no a reakshona mas.
Eksigensha di Aktuashon korektu
E Ombudsman Nashonal ta evalua basa riba e asina yama eksigensha di aktuashon korektu si gobernashon a komporta su mes korektamente of no. Den sierto sentido e ta forma un kodigo di komportamentu pa gobernashon. Ombudsman Nashonal a formula 22 eksigensha tokante gobernashon. Siudadano mester
por konfia ku gobernashon ta kumpli ku esaki.
Senora Eijk ta keha tokante e aktuashon di e deurwaarder di korte i e manera ku el a komunika kune. E Ombudsman Nashonal no por a komproba ku e deurwaarder a aktua inkorektu, dor di no hasi investigashon di reklamo komo paso siguiente den e kobransa. Pa loke ta toka su komunikashon Ombudsman
Nashonal a tira un bista riba e eksigensha di bon suministro di informashon i eksigensha di skucha e siudadano.
Bon suministro di informashon
Irefutabel ta ku e deurwaarder na 2011 a entrega na e partido kondena personalmente e kopia di e sentensha i di biaha a entregae ordo di pago. Tambe no ta disputa ku e deurwaarder a laga e `exploot van betekening' serka e anterior abogado di senora Eijk, ku e notifikashon ku e lo no a aktua
mas, ya ku un kolega deurwaarder lo a atende e kaso. Finalmente ta kla ku senora Eijk no tabata sa kon e mester pone e siguiente paso pa kontinua ehekushon di e sentensha.
E eksigensha di bon suministro di informashon ta ensera ku gobernashon ta perkura ku e siudadano ta hanja e informashon korektu i ku e informashon ta eksakto, kompleto i kla. E no ta duna informashon solamente ora e siudadano puntra pa esaki, pero tambe riba su mes inisiativa.
Lo tabata razonabel si e deurwaarder despues di entrega i notifika di e sentensha, lo a informa senora Eijk den un kombersashon tokante su eskogensha i kon pa pone e pasonan siguiente. E deurwaarder ta afirma ku di antemano el a diskuti e proseso di notifikashon i e pasonan siguiente ku senora
Eijk. Senora Eijk, despues di e notifikashon, tabata okupa tambe ku e siguiente paso: algun forma di investigashon di reklamo. Sin embargo, no tabata kla pa su persona kon e lo por a duna e siguiente paso aki forma. Den esaki, den un kombersashon e deurwaarder lo por a juda su persona sigui su
kaminda.Na mes momentu, un kombersashon asina lo a ofrese e oportunidat pa kita eventual mal entendido serka ambos for di kaminda, unda ta toka e kolega deurwaarder ku lo tabata okupa ku e kaso aki tambe, of e areglo di pago ku lo tabata akorda kaba.
Na mi huisio e deurwaarder no a suministra informashon adekuadamente ku razonabelmente por a spera di su persona komo deurwaarder di korte pa juda senora Eijk despues di e notifikashon di e sentensha kon pa kontinua den e demas implementashon di ehekushon di e sentensha. Asina tambe el a perde
e oportunidat pa elimina mal entendido entre nan tokante e proseso berdadero.
Skucha e siudadano
Senora Eijk ta afirma ku el a trata repetidamente i en vano pa alkansa e deurwaarder via telefon i via e-mail i ku e no tabata reakshona. Riba su kehu e vicepresidente di e tempu ey di Korte Komun di Hustisia na september 2011 a skirbi entre otro "ku di un deurwaarder por spera ku en todo kaso
e ta reakshona un biaha den bo direkshon" i "Mi ta tende mas biaha ku e deurwaarder aki ta inkomunikado i mi a jega di atende kaba riba esaki".
E ta un eksigensha di aktuashon korektu di gobernashon ku gobernashon ta skucha e siudadano aktivamente, di manera ku esaki ta sinti su mes skucha i mira. Esey ta nifika tambe ku un deurwaarder ta reakshona riba yamada di telefon of e-mail di siudadano den su asuntonan.
Senora Eijk ta afirma ku e deurwaarder no tabata komunikabel i tampoko a reakshona riba su notifikashon i preguntanan. Komo reakshon riba su kehu enkuanto esaki, hues na fin di 2011 a konfirma e imagen aki. E deurwaarder tambe ta rekonose ku e "no semper mesora" tabata reakshona riba yamada
telefoniko of e-mail. Finalmente, tambe e Ombudsman Nashonal ta ripara e imagen di e "deurwaarder ku no ta reakshona" durante su investigashon. Asina no por a establese un komunikashon aktivo i orienta riba solushon entre senora Eijk i e deurwaarder di korte. Di un deurwaarder di korte sin
embargo mester por a spera esaki.
Punto di atenshon
E siudadano den hopi aspekto ta depende di gobernashon. Ta p'esey un bon komunikashon entre siudadano i gobernashon ta importante. Bon komunikashon, por eskrito of via telefon, hopi biaha por solushona of preveni problema. Ku esaki ta logra ku e siudadano sa loke e por spera di gobernashon.
Esey ta hasi ku e siudadano ta sinti su mes tuma na serio i ta kontribui na konfiansa den gobernashon.
E Ombusman Nashonal a pidi e deurwaarder pa e tin atenshon pa e manera kon e ta aksesibel pa siudadano i ta reakshona den nan asuntonan. E deurwaarder awor por mustra mehorashon.
1 nomber fingi
Onderwerpen: