WILIAM "WILLY" PIAR 25 ANA TRAHANDO PA DEPORTE DI BONEIRU
Kralendijk--Dia prome di yanueari 2015 sr. Gregorio Wiliam "Willy" Piar a rekorda e echo ku 25 ana pasa e la drenta den servisio di gobiernu di Boneiru na Instituto di Deporte Boneriano INDEBON.
E selebrashon a tuma luga dia 9 di yanueari na Kompleho Deportivo Goerge Nicolaas kaminda tabatin un resepshon ameno den seno di famia, kolega i invitadonan di sr. Piar
Na e okashon aki hefe di INDEBON sr. Peter Silberie a hiba palabra i a gradisi sr. Piar pa e labor presta.
Silberie den su diskurso a bisa ku Piar ta un empleadonan ku a duna un gran aporte na INDEBON pero spesifikamente na e hubentut i deporte di Boneiru den su totalidat na Boneiru.
Di akuerdo ku Silberie, Piar ta un empleado ehemplar ku ta dedika na su trabou di deporte den Bario, na skolnan i pa deporte den su totalidat durante e 25 ana ku a transkuri.
Komo ku apesar di tur e lokual ku INDEBON i Piar a pasa aden durante e 25 ananan, no opstante problematika nan, sr. Piar a keda ku e enfoke di su trabou ku ta duna hubentut i skolnan les di ehersisio (deporte) manera mester ta.
Diputado enkarga ku deporte sr. James Kroon tambe a hiba palabra i a gradisi sr. Piar na nomber di gobiernu di Boneiru ku e gran labor presta pa deporte i hubentut di Boneiru. Kroon tambe tabatin palabranan bunita pa e labor ku Piar a presta na fabor di komunidat boneriano.
Despues di e elokuente diskursonan diputado Kroon a hasi entrega di e sertifikado di rekonosementu na sr. Piar pa e bon trabou ku e la desplega durante su trayektorio di su trabou na INDEBON. Koleganan tambe a hasi entrega di un boket di flor na sr. Piar komo muestra di apresio.